(الحلم) حامد زيد

بوقت من البطى وبليل تتراقص شياطينه..
بعد شفت الضيا ينزع من ثياب المساء ثلثين..
تحايلت المنام إلي مثل بيتك تمرينه..
وأنا إلي من تفارقنا وأنا ما غمضت لي عين..
غريبة كل حلم يمر في رقادي تزورينه..
والأغرب كيف احلم الحلم وارجع أحلمه بعدين..
قبل يومين شفتك في المنام وقمت من حينه..
ونمت أمس ورجع نفس المنام إلي قبل يومين..
أنا إلي قبل أسافر شلت قلبي من شرايينه..
تركته في يدك مثل الأمانة و احفظيها زين..
ترى حفظ الأمانة دين مجبورة تردينه..
اجل ما فيه احد قد قال لك حفظ الأمانة دين..
مرد المقفي بيلفي ويستوفي وتوفينه..
بعد ليله ثلاثة أربعه عشره شهر شهرين..
إذا أنتي منتي قد الكلام إلي تقولينه..
حرام استأمنك حاجه وإذا جيت أطلبك تنسين..
تخونين وتبين أرضى واحد يرضى تخونينه..
أنا إذا جيت أخونك مع حبيبه ثانيه ترضين..؟؟
من أول ما رجعت من السفر ما شفت لك بينه..
وأنا إلي أحسبك قبل أدوس ارض المطار تجين..
تكونين أنتي أول شخص عيني تحتضن عينه..
وكنت أتخيلك من زود فرحة رجعتي تبكين..
وأشوف بدمعتك حكيك واعرفه قبل تحكين..
و أزيد أحلى من إلي بتحكينه وأتركك تحكين..
تقولين الوطن نور أقول بنور مضوينه..
تقولي لي غديت أحلى وأقول عيونك الحلوين..
كلام نام بشفاهك وخفتي لا تصحينه..
ذخرتيه الغرام إلي ينام ويتركك تصحين..
تغانمتي غيابي لين رجحتي موازينه..
تعلم من يدك لمس الكفوف وعلمك تجفين..
وليتك لاقيتي به شي فيني ما تلاقينه..
مهو بغرور لكن خابرك مالك امل تلقين..
تغافلك بغلا وإلا الحلا مهو بمن زينه..

تزينه الصور والصحيح ابن الحلال زوين..
وانا ماني ناقص عنه يوم انتي تبدينه..
نصيبي هو نصيبي لو يسددها من الصوبين..
قنوع بمظهري والسم مايذبح ثعابينه..
على قول المثل ماني حلو لاكن ماني شين..
إذا اهداك الزهر مره فأنا اهديتك بساتينه..
وإذا الهاك بفرح ليله فنا تهت ببكاك سنين..
وإذا استضعفتك املاكه وشتتك ملايينه..
انا حتى فتات الخبز اقسمها معك نصين..
طموحي بس اجي واظفر بشئ تستحقينه..
تدينته تسلفته سرقته مو مهم منين..
كاني من كثر ماارضى بكل إلي تمنينه..
لو إنك تطلبين الله يعنيني بقول آمين..
انا ماالعب على الحبلين وقت الطيش وسنينه..
تبين الحين يوم إني كبرت العب على الحبلين..
ترى عند البدو بالذات عيب إلي تسوينه..
حلاتك لاعشقتيني تعشقيني ليوم الدين..
غرام نسكن ضلوعه حشيمه من مجانينه..
جفا يجمع معزتنا ولا عشق يذل ثنين..
كثار إلي تحدوني وقالوا تحبينه...
امانه لاتخليني صغير بعينهم تكفين..
لأني كل ماقالوا تخون اقول مسكينه..
عليك الله وامانه علميهم من هو المسكين..
انا خايف لاطاح الجمل تكثر سكاكينه..
وانا ماعادت ضلوعي تحمل طعنة السكين..
مثل ماقالوا المكتوب واضح من عناوينه..
لو ارحل منك للغربه واسافر من ضلامك وين..
كفايه كل حلم يمر في رقادي تزورينه..
كفايه من تفارقنا وانا ماغمضت لي عين..
قبل يومين شفتك في المنام وقمت من حينه..
ونمت امس ورجع نفس المنام إلي قبل يومين..



للاستماع ومشاهدة الالقاء علي اليوتيوب:

ستبقى حلمك الاكبر طالما انه لم يتحقق ....
شكرا لك اخي الجنتل لانك جعلتنا نشارك هذا الشاعر الكبير حامد زيد هذا الحلم الرائع والذي اتمنى ان لايبقى حلما فقط
سهر الليل